Sırdárya wálayatınan Qanlıkól rayonına kelgen jumısshı topar quramındaǵı Gúlistan qalası medicina birlespesiniń shıpakerleri ekinshi jer júzilik urıs veteranı Orazbay Nametullaevtıń shańaraǵında bolıp, medicinalıq tekseriwden ótkerdi.
Bıyıl 98 jastı qarsılaǵan urıs veteranı kórsetilip atırǵan ǵamqorlıq ushın Prezidentimizge minnetdarshılıq bildirdi. Miymanlarǵa qurallaslarınıń urıs jıllarındaǵı kórsetken erligi tuwralı aytıp berdi.
Orazbay ata 1942-jılı fronqa atlanıp, Ukrainanıń Xarkov hám Doneck wálayatlarındaǵı qanlı sawashlarda qatnastı. Sonday-aq, Moldova, Rumıniya, Vengriya, Avstriyanı azat etiwde erlik úlgilerin kórsetti. 1947-jılı tuwılǵan jerge aman-esen qaytıp kelip, kóp jıllar dawamında muǵallim bolıp isledi.
Aramızda sanawlı qalǵan ekinshi jer júzilik urıs veteranlarına Prezidentimiz tárepinen ayrıqsha húrmet kórsetilmekte. Olardıń urıs jıllarında kórsetken erligi xalqımız tárepinen hesh qashan umıtılmaydı.
D.ABIBULLAEV,
Qaraqalpaqstan xabar agentliginiń sholıwshısı
