Ózbekstan Respublikası Prezidenti Administraciyasınıń baslaması menen puqaralardıń sud-huqıq máseleleri boyınsha múrájatlarına unamlı sheshim tabıw maqsetinde gezektegi kóshpeli qabıllawlar usı jıldıń 25-27-aprel kúnleri aralıǵında Beruniy rayonınıń «Qıyat», Qońırat rayonınıń «Túrkistan», Shımbay rayonınıń «Tazǵara» awıllarında, Xojeli rayonınıń «Janqońırat» hám Nókis qalasınıń «Jeke terek» mákan puqaralar jıyınlarında bolıp ótti.
«Insan qádiri ushın» súreni astında tiykarınan eń shetki, shegaralas hám sociallıq-ekonomikalıq jaǵdayı awır aymaqlarda ótkerilgen qabıllawlarda puqaralar tárepinen kelip túsken múrájatlar taraw basshılarınıń qatnasıwında dodalanıp, mashqalalar imkaniyatı bolǵanınsha sol jerdiń ózinde sheshimin taptı.
Úsh kúnlik qabıllawlarda Bas prokuratura juwapkerleri tárepinen 340 máseleniń 143i sol jerdiń ózinde sheshimin taptı. Bul jerge úlken úmitler menen kelgen puqaralardıń dárti túrlishe bolǵanı menen olardı ádillik hám haqıyqat sheshim tabatuǵınına degen isenim úmiti birlestirdi.
Prezident Xalıq qabıllawxanaları hám 2-sektorǵa turaq jay menen támiyinlew boyınsha jollanǵan múrájat jergilikli hákimlikler, aymaqlıq arnawlı komissiya menen birgelikte kórip shıǵılıp, tórt múrájat iyesiniń kóp jıllıq arzıw-niyetin júzege shıǵardı. Solardıń qatarında Xojeli rayonınıń turǵını Azima Adilova óziniń 60 jasında turaq jayǵa iye boldı. Jası birazǵa barıp qalsa da ijarama-ijara júrgen bul puqaranıń quwanıshın sóz benen jetkeriw qıyın. Usı jerde Xojeli rayonında awır sociallıq jaǵdaydaǵı jáne úsh puqara turaq jay menen támiyinlendi.
Xojeli rayonınan Rita Qalbaeva Bas prokuratura juwapkerlerine kóp jıllardan berli aliment ala almay kiyatırǵanlıǵı tuwralı múrájat etti. Onıń bul múrájatı Májbúriy orınlaw byurosı xızmetkerleri tárepinen ol kútpegen dárejede orınlandı. Burınǵı ómirlik joldası tárepinen aliment pullarınıń esabınan olarǵa turaq jay alıp berildi. Qabıllaw barısında jáne 11 hayaldıń aliment pulı óndirildi.
Múrájatlardıń sheshimi múbárek Ramazan ayı múnásibeti menen iygilikli maqsetlerge ulastı. Sociallıq járdemge mútáj 7 shańaraqtıń perzentine alıs mekteplerge qatnawı ushın velosiped sawǵa etildi, usınday 6 shańaraqtıń perzentiniń mobilizaciyalıq shaqırıw rezervinde áskeriy xızmetin ótewi ushın tólemi, 7 studenttiń kontrakt-shártnama pulı tólep berildi.
Joqarǵı sud, Qaraqalpaqstan Respublikası, qala hám rayon sudları juwapkerleriniń qatnasıwında 236 múrájat kórip shıǵılıp, sonnan 86 másele sol jerdiń ózinde sheshimin taptı. Jınayat isleri boyınsha qalalıq hám rayonlıq sudları tárepinen múrájatlar tiykarında ótkerilgen kóshpeli sud májilislerinde 37 is kórildi. Bul múrájat iyeleriniń barlıǵı ayıbın tán alǵan, soǵan bola jazanıń belgili bir bólegin ótegen, qılmısına shen kewilden pushayman bolıp, dúzeliw jolına túskenligin aytıp, jáne bir imkaniyat soraǵan. Sud májilislerinde hár bir is tolıq kórip shıǵılıp, barlıq tárep tıńlanıp, aymaqlardaǵı ishki isler uyımları probaciya toparlarınıń usınıs xatları tiykarında 28 shaxs jazanı ótewden múddetinen burın shártli azat etildi, 8 shaxsqa tayınlanǵan erkinen ayırıw jazası jeńiliregi menen almastırıldı, táreplerdiń jarasqanlıǵı múnásibeti menen bir jınayat isi toqtatıldı.
Puqaralıq isleri boyınsha sudları tárepinen miynet haqı, aliment óndiriw boyınsha 19 múrájatshınıń dawa arzası qanaatlandırıldı. Bir qatar shańaraqlar jarastırılıp, ajırasıw hám aliment óndiriw boyınsha isler háreketten toqtatıldı. Nurdáwlet Polatov shańaraqtaǵı kelispewshilikler sebepli ajırasıw jaǵdayına kelip qaldı, hátteki ómirlik joldası úsh jasar qızı ushın aliment óndiriw ushın sudqa arza kirgizip te úlgerdi. Nurdáwlet búgingi kúnge kelip, shańaraǵı menen jarasıw tilegin bildirdi. Joǵarǵı sud juwapkerleri eki tárep penen sóylesiw júrgizip, olardı kelisimge shaqırdı, solay etip jáne bir shańaraq saqlap qalındı.
Ishki isler ministrligi juwapkerleri tárepinen sorastırıw hám tergew, jol háreketi qáwipsizligin támiyinlew, huqıqbuzarlıqlar profilaktikası, puqaralıq, pasport-viza, múlklerin alıp qoyıw hám qaytarmaw sıyaqlı baǵdarlarda 140 másele kórip shıǵılıp, sonnan 53i sol jerdiń ózinde unamlı sheshimin taptı.
Múrájatlar tiykarında ishki imkaniyatlar esabınan sociallıq járdemge mútáj shańaraqlardıń perzentlerine biypul rásmiylestirilgen puqaralıq pasportları, ID kartalar, bir toparına mayıplıq arbashaları, emleniw ushın orderler, ózin-ózi bánt etiw ushın úskeneler, elektr pechleri, kompyuter komplektleri tapsırıldı.
«Insan qádiri ushın» súreni astında ótkerilgen ǵalabalıq qabıllawlar sheńberinde respublika jumısshı topar wákilleri aymaqlarǵa shıǵıp, xalıqtıń bántligin támiyinlew, jumıssız hayal-qızlar hám jaslardı kásip-ónerge oqıtıw barısındaǵı joybarlardıń orınlanıwı úyrenildi. Bul boyınsha kóplegen múrájatlar unamlı sheshimin taptı.
Qabıllawlarda Qaraqalpaqstan Respublikası Joqarǵı Keńesi, Ministrler Keńesi, jergilikli hákimlikler, Ádillik ministrligi, Salıq hám Bajıxana, Milliy gvardiya basqarmaları juwapkerleri tárepinen múrájatlar kórip shıǵılıp, xalıqqa kóshpeli mámleketlik xızmetler kórsetildi.
Juwmaqlap aytqanda, úsh kúnlik qabıllawlar dawamında 1116 másele kórip shıǵılıp, sonnan 404 másele ornında unamlı sheshimin taptı, 237 múrájatshıǵa huqıqıy másláhát hám túsinik berildi, 475 múrájat boyınsha juwapkerler hám anıq múddet belgilenip, olardıń orınlanıwı Prezident Xalıq qabıllawxanaları tárepinen qadaǵalawǵa alındı.
Qabıllawǵa Qaraqalpaqstan Respublikası Joqarǵı Keńesiniń Baslıǵı M.Kamalov, Qaraqalpaqstan Respublikası Ministrler Keńesiniń Baslıǵı Q.Sariev qatnastı
D.ABIBULLAEV,
Qaraqalpaqstan xabar agentliginiń sholıwshısı
