Aralboyı aymaǵında ekologiyalıq apatshılıq aqıbetlerin jumsartıw hám jasıl toǵayzarlar menen qaplamalar payda etiw boyınsha alıp barılıp atırǵan jumıslar menen jaqınnan tanısıw hám bul iygilikli iske ózleriniń úlesin qosıw, sonday-aq, Ózbekstandaǵı BMSh qáwenderligindegi Aral regionı ushın kópsheriklik trast fondı sheńberinde ámelge asırılıp atırǵan joybarlar menen jaqınnan tanısıw maqsetinde Evropa awqamı delegaciyası hám oǵan aǵza mámleketler diplomatiyalıq korpuslarınıń basshıları, BMSh tıń Ózbekstandaǵı wákilxanası, Ózbekstan Respublikası Investiciyalar hám sırtqı sawda ministrligi,Ekologiya hám qorshaǵan ortalıqtı qorǵaw komiteti wákillerinen ibarat delegaciya respublikamızǵa keldi.
Delegaciya aǵzaları dáslep Ózbekstan Respublikası Prezidenti janındaǵı Aralboyı xalıqaralıq innovaciya orayınıń Moynaq rayonındaǵı «Tikózek» ilimiy-óndirislik maydanshasında boldı.
Atap ótiw orınlı, Evropa awqamı wákilxanası hám Aralboyı xalıqaralıq innovaciya orayı arasında Aralboyı aymaǵında EAnıń qarjılay járdeminde 27 mıń túp sayamanlı terek hám shól ósimliginiń nálin egip, baǵ jaratıw boyınsha kelisimge erisilgen edi. Usı kúni Evropa awqamı delegaciyası hám oǵan aǵza mámleketlerdegi diplomatiyalıq korpuslardıń basshıları, Qaraqalpaqstan Respublikası Ministrler Keńesi, tiyisli ministrlikler, komitetler, Aralboyı xalıqaralıq innovaciya orayınıń wákilleriniń qatnasında nál egiw jumıslarına start berildi. Ilaj qatnasıwshıları «Kemeler qoyımshılıǵı» ashıq dala muzeyi átirapına seksewil hám qandım ósimligi nállerin ekti.
Delegaciya aǵzalarınıń saparı dawam etpekte.
Qaraqalpaqstan xabar agentligi
