Korrupciya sonday bir illet ol bir tarawǵa emes, al pútkil jámiyettiń rawajlanıwına tosqınlıq etedi. Bul illet hár qanday jámiyettiń siyasiy hám ekonomikalıq rawajlanıwına zıyanın tiygizip, jámiyette nızam ústinligin kúshsizlendiredi.
Qaraqalpaqstan Respublikası Ósimlikler karantini hám onı qorǵaw agentliginde de korrupciyanıń aldın alıw boyınsha kompleksli ilajlardı ámelge asırıw jolǵa qoyılǵan bolıp, házirgi kúnde agentliktiń apparatı hám onıń quramındaǵı mákeme basshıları tárepinen taraw xızmetkerleri hám jámiyetshilik arasında ilajlar ótkerilmekte.
Ótkerilip atırǵan ilajlarda tarawda korrupciyaǵa qarsı gúresiwdiń tiykarǵı baǵdarları, tekseriwler ótkeriw hám quramındaǵı mákemelerdiń jumısların úyreniw, korrupciyanıń aldın alıw hám oǵan qarsı úgit-násiyat ilajları ámelge asırılmaqta. Bul ilajlarda agentliktiń hár bir xızmetkerine óz xızmet wazıypalarına juwapkershilik penen qaraǵan halda ádalatlı xızmet kórsetiwi, korrupciyaǵa baylanıslı nızambuzıwshılıq háreketleri ushın juwapkershiliktiń belgilengenligi, xızmetkerlerdiń ádep-ikramlılıq qaǵıydalarına ámel etiwi, puqaralar hám yuridikalıq tárepler menen múnásibette (hadal) pák, ádil hám ǵárezsiz bolıwı kerek ekenligi keń túrde túsindirilmekte.
– Bunday ilajlardan tiykarǵı maqset – tarawda korrupciyaǵa qarsı gúresiw siyasatın jolǵa qoyıw, mámleketimizdiń rawajlanıwına tosqınlıq etetuǵın korrupciya illetine qarsı gúresiw bolıp esaplanadı,-deydi agentliktiń kadrlar boyınsha bas qánigesi M.Arzımbetova. – Agentliktiń 2022-jıl 31-yanvardaǵı Ózbekstan Respublikası ósimlikler karantini hám onı qorǵaw agentligi sistemasında korrupciyaǵa qarsı gúresiw hám onıń aldın alıw boyınsha jumıslardı nátiyjeli shólkemlestiriw hám huqıqıy tiykarların bekkemlew haqqında»ǵı arnawlı buyrıǵına muwapıq, ósimlikler karantini hám onı qorǵaw agentliginiń korrupciyaǵa qarsı gúresiw siyasatı belgilep berilgen. Bunnan maqset – tarawda ádillik siyasatın támiyinlew, yaǵnıy, xızmetkerler hám ulıwma jámiyetshilik arasında korrupciyaǵa qarsı gúresiw mádeniyatın arttırıw, xızmet wazıypaların orınlaw waqtında agentlik xızmetkerleri tárepinen korrupciyalıq háreketler júz beriwiniń aldın alıwdan ibarat.
Agentliktiń bos jumıs orınlarına tańlaw tiykarında (Vacancy.argos.uz) portalı arqalı jumısqa qabıllaw sisteması jolǵa qoyılǵan. Agentliktiń bos jumıs orınları ushın múrájat etken hám jumısqa qabıllanıp atırǵan puqaralardan mápler soqlıǵısıwınıń bolmaslıǵın anıqlaw maqsetinde arza toltırıladı. Eger mápler soqlıǵısıwı anıqlanǵan jaǵdayda tiyisli uyımlarǵa xabarnama jiberiledi.
Esletip ótemiz; Ósimlikler karantini tarawına baylanıslı múrájatlardı jollaw hám korrupciya jaǵdayları boyınsha xabardar etiw boyınsha agentliktiń isenim telefonları (71-202-10-00), ishki nomer (2951) arqalı málim etip bildiriw múmkinshiligi bar.
Qaraqalpaqstan xabar agentligi
