Bas ministrdiń orınbasarı – investiciyalar hám sırtqı sawda ministri Sardor Umurzaqovtıń basshılıǵında Ózbekstannıń Vengriya, Qırǵızstan hám Tájikstan menen investiciyalıq, sawda-ekonomikalıq birge islesiw máselesi, baylanıstı jáne de jedellestiriwge baylanıslı ámeliy ilajlardı dodalawǵa baǵıshlanǵan videokonferenciya májilisi bolıp ótti.
Ilajǵa ministrlikler, uyımlar, tarmaq birlespeleri, kommerciyalıq bankler Qaraqalpaqstan Respublikası, wálayatlar hám Tashkent qalası jergilikli hákimiyat uyımlarınıń basshıları, respublikamızdıń Vengriya, Qırǵızstan hám Tájikstandaǵı diplomatiyalıq wákilxanalarınıń basshıları, usı mámleketlerdegi isbilermenler menen tikkeley birge islesip atırǵan isbilermen toparlardıń wákilleri qatnastı.
2021-jıl Vengriya, Qırǵız Respublikası hám Tájikstan menen ótkerilgen joqarı dárejedegi ilajlar úlken ámeliy áhmiyetke hám nátiyjelilikke iye bolıp, ushırasıwlar juwmaǵında tiyisli «Jol kartaları» qabıl etilgenligi atap ótildi.
Májilis dawamında ámeldegi kelisimlerdiń orınlanıwı hár tárepleme kórip shıǵıldı, payda bolǵan máseleler tallandı. Mashqalalardı operativ sheshiw jolları islep shıǵılıp, juwapkerlerge tiyisli kórsetpe berildi.
Atap aytqanda, eki tárepleme shártnamalardı xatlawdan ótkeriw, mashqalalı máseleler ústinde jumıs alıp barıw maqsetinde sırt el sherikleri menen qosımsha sóylesiwler shólkemlestiriw belgilendi. Tastıyıqlanǵan investiciyalıq joybarlardıń waqtında orınlanıwın támiyinlew hám intakerlerge ámeliy járdem kórsetiw wazıypası qoyıldı.
Tarmaq birlespeleri basshıları tárepinen investiciyalıq hám sawda tarawında birge islesiwdi rawajlandırıwdıń házirgi jaǵdayı, sonday-aq, keleshektegi rejeler haqqındaǵı esabatlar usınıldı. Ekonomikalıq qatnasıqlardı tereńlestiriw maqsetinde imkaniyatlardan maksimal dárejede paydalanıw boyınsha kórsetpe berildi.
Sóylesiw juwmaǵında Investiciyalar hám sırtqı sawda ministriligine qısqa múddette jańa perspektivalı investiciyalıq joybarlar hám sawda kelisimleriniń dizimin usınıw, sırt elli birge islesiwshiler menen sóylesiwlerdi jedellestiriw tapsırıldı.
ÓzA
