Házirgi waqıtta, ósip kiyatırǵan jas áwladtı salamat, intellektuallıq jaqtan jetik etip tárbiyalaw, sociallıq járdemge mútáj insanlarǵa medicinalıq xızmet kórsetiwdi shólkemlestiriw, ásirese, alıs awıllardaǵı xalıqqa medicinalıq járdem kórsetiw boyınsha bir qatar ilajlar ámelge asırılmaqta.
Usı jıl 10-17-may kúnleri Qaraqalpaqstan Respublikası «Salamat áwlad ushın» qayırqomlıq fondı tárepinen Ózbekstan Temir jol akcionerlik jámiyeti menen birgelikte Tashkent-Qońırat, Qaraqalpaqtan-Jaslıq, Qońırat-Tashkent jónelisinde salamatlıq poezdı shólkemlestirildi.
10-may kúni jolǵa shıqqan «Salamatlıq poezdı» 11-may kúninen óz jumısın basladı.
Mámleketlik baǵdarlamaǵa kirgizilgen eń shetki, barıw qıyın bolǵan aymaq Qaraqalpaqtan stanciyası xalqın 12-13-may kúnleri kóshpeli medicinalıq patronaj brigadası xızmetkerleri hám Ózbekstan temir jol akcionerlik jámiyeti ambulator joqarı dárejeli qánigeler menen óz jumısların basladı.
Aymaqtaǵı sociallıq járdemge mútáj, baǵıwshısın joǵaltqan, kóp balalı shańaraqlar hám jası úlken ata-analar, hayal-qızlar, mayıp balalar tereńlestirilgen medicinalıq tekseriwden ótkerildi. Tekseriw nátiyjesinde xalıqqa biypul dári-dármaqlar, vitaminler, kóz áynekler, vitaminge bay keptirilgen suplar, sanitariyalıq-gigienalıq buyımlardan ibarat járdemler berildi.
Bul qayırqomlıq akciyası 14-15-may kúnleri Jaslıq stanciyasında dawam etiwi rejelestirilmekte.
Esletip ótemiz, bir hápte dawamında usı ilaj sheńberinde tájiriybeli qánigeler tárepinen jası úlken insanlar, mayıplıǵı bolǵan balalar, hayal-qızlar, baǵıwshısın joǵaltqan hám kóp balalı shańaraqlar medicinalıq tekseriwden ótkerilip, orınlarda arnawlı mákemelerge, járdemshi mektep hám mektepke shekemgi biimlendiriw shólkemlerine qayırqomlıq járdemleri tapsırıladı, sonday-aq, xalıq arasında salamat turmıs tárizin úgit-násiyatlawǵa baǵdarlanǵan ushırasıwlar ótkeriledi.
Á.Jiemuratov,
Qaraqalpaqstan xabar agentligi
