Qaraqalpaqstan Respublikası Joqarǵı Keńesiniń Baslıǵı M.Kamalov 9-may -Eslew hám qádirlew kúni, sonday-aq, Ekinshi jer júzilik urısta erisilgen jeńistiń 77 jıllıǵı bayramı aldınan Ekinshi jer júzilik urıs qatnasıwshılarınıń shańaraqlarında bolıp, bayram sawǵaların tapsırdı.
Prezidentimizdiń baslaması menen Ekinshi jer júzilik urıs qatnasıwshılarına, front artı miynet veteranlarına, ǵárezsizlik jıllarında xızmet wazıypasın atqarıw waqtında qaytıs bolǵan áskeriy hám huqıq qorǵaw uyımları xızmetkerleriniń shańaraq aǵzalarına materiallıq hám morallik járdem kórsetilmekte.
Respublikamız basshısı Tórtkúl rayonında jasawshı Ivan Golenko, Qaraózek rayonında jasawshı Genjemurat Allaniyazov, Nókis qalasında jasawshı Qádirbay Narmanov hám Qanlıkól rayonında jasawshı Orazbay Nametullaevlardı Ekinshi jer júzilik urısta erisilgen jeńistiń 77 jıllıǵı bayramı menen qutlıqladı. Urıs vetaranlarına Prezidentimizdiń bayram qutlıqlawı oqıp esittirildi hám Ózbekstan Respublikası Prezidenti atınan 15 000 000 (on bes million) sum muǵdarında bir mártelik aqshalay sıylıqtı saltanatlı jaǵdayda tapsırdı. Qaraqalpaqstan Respublikası Joqarǵı Keńesi, hákimlikler, ministrlikler atınan bahalı sawǵalar berildi.
Respublikamız hám rayon kórkem óner sheberleri, Arqa-batıs áskeriy okrugi áskeriy orkestri aǵzaları tárepinen urıs jıllarınıń qosıq hám namaları atqarılıp, jaslar tárepinen veteranlarımızǵa sheksiz húrmet kórsetildi.
Qaraqalpaqstan xabar agentligi.
M.HÁBIBULLAEVtıń túsirgen súwretleri
