Respublikamızda 9-may -Eslew hám qádirlew kúni, sonday-aq, Ekinshi jer júzilik urısta erisilgen jeńistiń 77 jıllıǵı keń túrde belgilendi.
Usı múnásibet penen Nókis qalasındaǵı Eslew maydanında ótkerilgen ilajǵa respublikamızdıń basshıları, miynet veteranları, huqıq qorǵaw uyımları, oqıw orınları, jámiyetlik shólkemlerdiń, keń jámiyetshilik hám ǵalaba xabar qurallarınıń wákilleri qatnastı.
Dáslep Qaraqalpaqstan Respublikası Joqarǵı Keńesiniń Baslıǵı M.Kamalov, Ministrler Keńesiniń Baslıǵı Q.Sariev basqa da rásmiy adamlar áskeriy orkestr naması astında «Hásiretli ana» esteligine gúl sheńberlerin qoydı.
Bunnan keyin ministrlikler menen uyımlar, oqıw orınları, jámiyetlik shólkemler, veteranlar hám internacionalist-jawıngerler atınan da gúl sheńberleri qoyıldı.
Ilajda Ózbekstan hám Qaraqalpaqstan Respublikalarınıń Mámleketlik gimnleri atqarıldı.
Qaraqalpaqstan xabar agentligi.
M.HÁBIBULLAEVtıń túsirgen súwretleri
