9-may – Eslew hám qádirlew kúni múnásibeti menen ministrlikler, miynet jámáátleri, barlıq qala hám awıllarda ekinshi jer júzilik urıs qatnasıwshıları hám miynet veteranlarınan xabar alınıp, bayram sawǵaları tapsırıldı.
Ózbekstan Respublikası Oliy Majlisi Senatı aǵzası B.Matmuratov, Ózbekstan «Milliy tiklanish» demokratiyalıq partiyası Qaraqalpaqstan Respublikası Keńesi wákilleri, Nókis qalalıq Keńesi deputatları, Jaslar parlamentiniń aǵzaları partiyanıń «Izlew» joybarı sheńberinde ekinshi jer júzilik urıs qatnasıwshılarınıń jaǵdayınan xabar aldı.
Ilajdı shólkemlestiriwden tiykarǵı maqset – 9-may –– Eslew hám qádirlew kúnin, ekinshi jer júzilik urıs qatnasıwshıların, front artı miynet veteranların hám ǵárezsizlik jıllarında xızmet wazıypasın orınlaw waqtında qaza bolǵan áskeriy hám huqıq qorǵaw uyımları xızmetkerlerin eslep, húrmet kórsetiw bolıp esaplanadı. Sonday-aq, xalqımızǵa tán bolǵan miyrim-shápáát, awızbirshilik, insanıylıq, keńpeyillik hám qayır-saqawat ortalıǵın bekkemlew, jas áwladtı milliy úrp-ádet, dástúrlerimizge sadıqlıq hám ulıwma insanıylıq qádiriyatlarǵa húrmet ruwxında tárbiyalaw, usı muqaddes sáneni joqarı dárejede belgilew bolıp esaplanadı.
Ilaj dawamında Nókis qalasında jasawshı Ekinshi jer júzilik urıs qatnasıwshısı Qádirbay ata Narmanovtıń úyine barıp, onıń jaǵdayınan xabar alındı hám bayram sawǵaları tapsırıldı.
Qaraqalpaqstan xabar agentligi
